Татарстанның балалар омбудсмены Ирина Волынец биш һәм аннан күбрәк бала тапкан һәм тәрбияләүче хатын-кызлар өчен иминият стажын исәпләү буенча чикләүне гамәлдән чыгарырга тәкъдим итте. Дәүләт Думасының гаилә, хатын-кызлар һәм балалар комитеты рәисенең беренче урынбасары Татьяна Буцкаяга шул хактагы мөрәҗәгатьне юллаганнар инде, дип яза RT.
Волынец билгеләп үткәнчә, «Иминият пенсияләре турында»гы закон нигезендә әти-әниләрнең берсенең һәр баланы 1,5 яшькә җиткәнче – әмма гомумән алганда 6 елдан да артык түгел – караган вакыты иминият стажына кертелә. Шул ук вакытта, пенсия коэффициентлары күп дигәндә дүрт бала өчен исәпләнә.
Спикер әйтүенчә, шуның нәтиҗәсе буларак, биш һәм аннан күбрәк бала тапкан һәм тәрбияләүче аналар, үзләренә файдалы булмаган шартларда, аларны карау өчен ял алган. Ягъни, мисал өчен, аларның бишенче баланы караган вакытлары исәпкә алынмаганлыктан, мондый әниләрнең пенсиясе дә азрак.
Шуңа бәйле рәвештә, Волынец тәкъдим ителгән үзгәрешләрне «Иминият пенсияләре турында»гы федераль законга кертүне сорый.
