Кичә Әгерҗе районының элеккеге башлыгы Валерий Макаров озакка сузылган авырудан соң 58 яшендә вафат булды. Шул сәбпле Татарстан җитәкчелеге кайгы уртаклашты.
«Макаров үзен югары квалификацияле, энергияле һәм җаваплы җитәкче буларак күрсәтте. Куелган максатка ирешүдә үҗәтлеге, эшенә чын күңелдән бирелгәнлеге, кешеләргә игътибарлы мөнәсәбәте нәтиҗәсендә ул хезмәттәшләре һәм җәмәгатьчелек арасында танылуга иреште һәм зур абруй казанды. Валерий Владимирович Макаровның якты истәлеге күңелләребездә мәңге сакланачак», - диелә кайгы уртаклашу текстында.
Валерий Макаров 1965 елның 16 февралендә Зәйдә туган, 2002 елда - Казан дәүләт архитектура-төзелеш академиясен, 2018 елда «ТИСБИ» идарә университетын тәмамлаган.
Һөнәри эшчәнлеген 1989 елда Чаллыда «Вита» кече предприятиесендә җитештерү буенча инженер буларак башлаган. 1992-1996 елларда - «Техтранс» фәнни-җитештерү фирмасының транспорт буенча директор урынбасары, аннары «Камагрострой»да җитештерү буенча директор урынбасары булып эшләгән. 1998-2001 елларда «Бензин сервис» җаваплылыгы чикләнгән җәмгыятен җитәкләгән, 2001 елда «Нефтеснаб» ҖЧҖ директоры итеп билгеләнгән.
Макаровны 2013 елда Әгерҗе районы башлыгы итеп сайлыйлар, ул муниципалитетны 7 елдан артык җитәкли. Аның актив катнашында авыл җирлекләре төзекләндерелә, торак-коммуналь хуҗалык системасының өзлексез эшчәнлеге тәэмин ителә. Торак һәм социаль-мәдәни объектлар төзү программасы гамәлгә ашырыла, аерым алганда, «Олимп» спорт-сәламәтләндерү комплексы, балалар иҗаты йорты, «Орешник» парклы ял зонасы төзелә.
Макаров кешеләрнең яшәү шартларын һәм сыйфатын яхшыртуга зур игътибар бирә, өлкән буынны даими кайгырту һәм аларга ярдәм күрсәтү аның өстенлекле эш юнәлеше була.
Валерий Владимирович күпьеллык нәтиҗәле хезмәте һәм һөнәри уңышлары өчен «Фидакяр хезмәт өчен» медале, ТР Президентының Рәхмәт хаты, республика министрлыклары, ведомстволары һәм иҗтимагый оешмаларының Мактау грамоталары белән бүләкләнә.
Кайгынамәне Татарстан Рәисе Рөстәм Миңнеханов, ТР Дәүләт Киңәшчесе Минтимер Шәймиев, ТР Дәүләт Советы Рәисе Фәрит Мөхәммәтшин, ТР Премьер-министры Алексей Песошин, ТР Рәисе администрациясе җитәкчесе Әсгать Сәфәров, «Татарстан Республикасы муниципаль берәмлекләр советы» ассоциациясе рәисе Әгъзам Гобәйдуллин, Чаллы мэры Наил Мәһдиев, Әгерҗе районы башлыгы Ленар Нургаянов һәм Зәй районы башлыгы Рәзиф Кәримов имзалаган.