Әл-Әхли госпиталендә шартлау булганнан соң Татарстан мөфтие Камил хәзрәт Сәмигуллин Газа секторындагы хәлгә карата фикерен белдерде. Бу турыда ул Telegram-каналында язды.
«Үлемнән хастаханәгә качкан авырулар, балалар, хатын-кызлар, картлар, тыныч халыкка авиаһөҗүм Палестина халкына геноцидның чираттагы, коточкыч акты булды», – дип үз фикере белән уртаклашкан Татарстан мөселманнары Диния нәзарәте рәисе.
Камил хәзрәт фикеренчә, бу хәл «халыкара ислам җәмәгатьчелегенең Палестинаны җир йөзеннән юкка чыгару турындагы барлык шик-куркуларын раслаган».
Мөфти билгеләп үткәнчә, Татарстан мөселманнары Диния нәзарәте хәзер «Газадагы мөселманнарга ярдәм итү мөмкинлекләрен өйрәнә һәм өстәмә акча җыю турында хәбәр итәчәк». Әлегә ул республика имамнарын һәр намаздан соң җәмәгатьчелек белән Палестина өчен дога кылырга чакырды.
«Мин шәхсән үземнән һәм Татарстанның барлык имамнары исеменнән ил җитәкчелегенә бу авыр көннәрдә кардәшләребезгә ярдәм иткәне өчен рәхмәт белдерәм. <...> Ислам өммәте һәм халыкара җәмәгатьчелек булган хәлләрне хөкем итү генә түгел, ә Палестина халкын Израиль агрессиясе һәм оккупациясеннән яклау чараларын да күрергә тиеш», – дип өсти Камил Сәмигуллин.
Искәртеп үтик, бер көн элек Газа секторындагы әл-Әхли хастаханәсенә ракета төште, 800 кешенең үлеме турында хәбәр ителә. Секторның Сәламәтлек саклау министрлыгы һәм ХАМАС радикаль хәрәкәте хастаханәне утка тотуда Израильне гаепли. Израильнең Саклану армиясе (ЦАХАЛ) госпитальгә «Ислам җиһады» төркеме (Россиядә тыелган террор оешма) сугышчылары җибәргән ракета эләккән дип белдерә.
Россия Президенты Владимир Путин Газа секторындагы фаҗига конфликтның тәмамлануына сигнал булыр дип өметләнә. АКШ президенты Джо Байден хастаханәдә булган хәл өчен җаваплылыкны сугышчыларга йөкләде һәм ХАМАСның ИГИЛдан (Россия һәм башка күп кенә илләрдә тыелган террор оешма) куркынычрак булуын билгеләп үтте.