Кукмара районы Мәчкәрә авылының XIX гасыр уртасына караган борынгы мәчетендә пар казаннары бүлмәсе һәм тәһарәтханә җиһазландырыла. Бу хакта Министрлар Кабинетында узган брифингта Татарстан Республикасының Мәдәни мирас объектларын саклау комитеты рәисе Иван Гущин сөйләде.
«Территориядә инженерлык челтәрләре үткәреп, пар казаннары бүлмәсе һәм тәһарәтханә төзү планлаштырыла. Төзекләндерү эшләренә брусчатка салу, утыргычлар урнаштыру, газон утырту, чәчәк түтәлләре ясау һәм куаклар утырту каралган», — дип аңлатма бирде Гущин.
Ул шулай ук билгеләп үткәнчә, беренче чираттагы авариягә каршы чаралар тәмамлану стадиясендә: хәзер манара һәм янкорма төзелеше башкарыла, нигезләрне ныгыту, ярыкларны ремонтлау инде тәмамланган. Фундамент плитәсе һәм субай кагу өчен чокырлар әзерләнгән, кирпеч корылма ремонтланган һәм гөмбәзләр ныгытылган.
Ремонт-реставрация эшләренең киләсе этабында түбәне төзекләндерү, фасадны ремонтлау, агач тәрәзә һәм ишек блокларын монтажлау, шулай ук декоратив элементлар белән эчке бизәү эшләре планлаштырыла.
