Халыкара «Татар кызы» бәйгесендә Ростов өлкәсен Галия Палютина тәкъдим итә. Галия сүзләренчә, моңа кадәр бәйгедә Ростов кызлары катнашмаган. Ул бәйгедә Ростов өлкәсе һәм Дон татарлары исеменнән чыгыш ясавы белән горурлануы турында сөйләде.
«Мин туган шәһәремне һәм бөтен Ростов өлкәсен тәкъдим итү белән горурланам. Бөтен Дон татарлары җәмгыятебезне үземә иярткән кебек хис итәм. Мин үз миссиямне аңлыйм, чөнки беренче булып Ростов татарларына бу конкурска юл ачтым. Һәм миннән соң Ростов кызлары бу конкурста катнашырлар, дип өметләнәм. Тулаем алганда, Дон татарларының татар мәдәнияте турында күбрәк белүен, бер-берсе белән аралашуын телим», – дип сөйләде «Татар кызы» финалисты.
Фото: © Александра Живушкина
Галия Палютинага 28 яшь, ул Ростов дәүләт икътисад университетында кече фәнни хезмәткәр булып эшли, мәгълүмати технологияләр өлкәсендә фәнни тикшеренүләр белән шөгыльләнә. Галия финалдагы һәр кызны җиңүче, дип атады. «Татар кызы – ул дуслык конкурсы, без барыбыз да бер-беребезгә бик булышабыз, ярдәм итәбез һәм бер-беребез турында кайгыртабыз», – ди ул.
«Минемчә, без барыбыз да җиңүче, чөнки без финалда, без Ташкентка барабыз. Һәркем зур юл үтте. Конкурс барлык юнәлешләр буенча да бик көчле. Киемнәр, макияж, чәч бизәү, чигү, пешерү, бию, вокал, кызлар белән аралашу, файдалы лекцияләр – болар барысы да тормышта бик кирәкле. Бу матурлык бәйгесе генә түгел, бу безнең татар мәдәнияте бәйгесе. Монда мин халкыбыз, тарихыбыз, гореф-гадәтләребез, татар телен белү дәрәҗәсен яхшырту турында бик күп өйрәнәм», – диде Галия.
Фото: © Александра Живушкина
Ул Ростовтагы татар оешмасының яшьләр хәрәкәте белән ике ел җитәкчелек итә. Галия татар яшьләренең дуслашуына шат булуын белдерде. Аның сүзләренчә, Ростовта татар җәмгыяте яхшы үсеш кичерә. Галия Палютина узган ел Татар мәдәни үзәге ачылуын, Ростовта «Ак калфак» хатын-кызлар оешмасы барлыкка килүен дә билгеләп үтте.
«Мин үземне Ростовта татар итеп хис итәм. Татар телендә сөйләшә алырлык татар дусларым бар. Мин татар чараларына һәм очрашуларына йөрим. Ростовта татарларның активы бар, һәм елдан-ел хәл яхшыра бара, Ростов үз татар җәмгыятен бик яхшы үстерә. Татар яшьләре әкренләп дуслаша бара, мин моңа бик шат. Быел без җәмгыятебез белән башка шәһәрләргә Сабантуйларга еш йөрдек: Әстерханда Бөтенроссия Сабантуенда булдык», – дип сөйләде ул.
Фото: © Александра Живушкина
Галиянең киләчәккә хыялы да татар мәдәнияте белән бәйле. Ул Ростовта татар яшьләренең хәрәкәтен үстерергә, хатын-кызлар клубы ачарга тели.
«Ростовта яшьләр арасында көчле татар хәрәкәтен үстерергә телим. Шулай ук кызлар җәмгыятен, хатын-кызлар клубын оештырасым килә. Анда психология, туклану, сәламәтлек, спорт, әдәбият, бизнес, финанс өлкәләре буенча мөһим белемнәр тупларга мөмкин булачак. Инде беренче адымнарымны да атладым. «Заманча татар кызы» темасына беренче онлайн халыкара түгәрәк өстәл үткәрдек. Анда төрле шәһәрләрдән һәм илләрдән татарлар катнашты», – дип сөйләде Гаия Палютина.
