Әгерҗедә янгында ир-ат һәм хатын-кыз һәлак булганнан соң, җинаять эше кузгатылган. Бу хакта Россия Федерациясе Тикшерү комитеты җитәкчесенең Татарстан буенча өлкән ярдәмчесе Андрей Шептицкий хәбәр итте.
Элегрәк «Татар-информ» язганча, бүген иртәнге сәгать 5.30 тирәсендә Вокзал урамындагы йортта янгын чыга. Урынга килгән янгын сүндерүчеләр ике мәет тапкан. Янгынның мәйданы 1 квадрат метр тәшкил иткән.
Прокуратурада хәбәр итүләренчә, үлгән бу ике кешенең өсләрендәге киемнәре янган. Гәүдәләр 45 яшьлек ир-ат һәм 46 яшьлек хатын-кызныкы. Вакыйга сәбәпләрен тикшерүне прокуратура үз контроленә алган.
Тикшерүчеләр версиясенә караганда, бергә яшәгән бу ике кеше арасында спиртлы эчемлек куллану аркасында тавыш чыга. Ир-ат дустына янучан сыеклык сибә һәм ут төртә. Хатын-кыз урында үлә, ә үзенә дә ут капкан ир-ат ишегалдына чыгып чабарга өлгерә, әмма анда егыла һәм үлә.
Бу факт буенча тикшерүчеләр тарафыннан «ике яки аннан күбрәк кешене үтерү» маддәсе буенча җинаять эше кузгатылган. Фаҗиганең барлык шартларын ачыклауга юнәлдерелгән тикшерү эше алып барыла.