Татарстан Рәисе Рөстәм Миңнеханов VIII Көнчыгыш икътисади форум кырларында Россия Хөкүмәте Рәисе урынбасары Марат Хөснуллин белән очрашты. Бу хакта республика җитәкчесенең матбугат хезмәте хәбәр итә.
Алар М12 Мәскәү - Казан тизйөрешле федераль юлы төзелеше проектын гамәлгә ашыру турында фикер алышты. Очрашуда Казан мэры Илсур Метшин да катнашты.
Бүген Көнчыгыш икътисади форумның пленар сессиясендә Россия Президенты Владимир Путин белдергәнчә, быел автомобиль юлы Казанга, аннары Екатеринбургка һәм Төмәнгә кадәр салына, киләчәктә киң күләмле проектны дәвам итү планлаштырыла. Аның сүзләренчә, тизйөрешле магистральләр Ерак Көнчыгыш аша Тын океанга кадәр уза, бердәм транспорт коридоры барлыкка киләчәк.