2022 ел йомгаклары нәтиҗәсендә Татарстан торак-коммуналь хуҗалыгы хезмәтләрен куллануга чыгымнар буенча Россия төбәкләре арасында 21нче урынны алды. Бу РИА Рейтинг үткәргән тикшеренү нәтиҗәләреннән күренә.
Республикада яшәүче уртача гаиләнең торак-коммуналь хезмәтләргә чыгымнары 9,1 процент тәшкил итә, еллык күрсәткечтә ул 0,5 процентка кимегән. 2022 елда торак-коммуналь хезмәтләргә һәм яктырту, җылыту өчен ягулыкка чыгымнар 4214 сум булган.
2022 елда Россиянең төрле төбәкләрендә торак-коммуналь хуҗалык хезмәтләренә тотылган чыгымнар өлеше 6,2 проценттан 13,7 процентка кадәр тәшкил иткән. Экспертлар фикеренчә, бу гаиләләрнең гомуми куллану чыгымнары, торак-коммуналь хезмәтләрне куллану һәм тарифлар күләме белән бәйле.
2022 ел нәтиҗәләре буенча торак-коммуналь хуҗалык хезмәтләренә иң аз чыгымнар Дагыстанда (6,2%), Курск өлкәсендә (6,6%) һәм Севастопольдә (6,7%) тотылган, ә иң күбе Магадан өлкәсендә (13,7%), Камчатка краенда (13,5%) һәм Чукотка автономияле округында (13,4%). Федерациянең 48 субъектында ул 10 проценттан да кимрәк, 37 төбәктә артыграк.
Торак-коммуналь хезмәтләр өчен иң күп акчаны (башкалада коммуналь хезмәтләр өчен уртача гаилә чыгымнары аена 9925 сум тәшкил итә) Мәскәү халкы түли.
