Алабугада яшәүчеләр район башлыгы гранты ярдәме белән коймаларын алыштыра. Шулай итеп, Алабугада коймаларны төзекләндерүгә тотылган акчаларның бер өлешен кире кайтару буенча район башлыгы гранты үз эшен дәвам итә. Бу хакта «Алабуга нуры» хәбәр итә.
Шишкин урамында яшәүче Волковлар гаиләсе дә бу мөмкинлектән файдаланып, коймаларын тәртипкә китерергә карар кабул итә. Гаилә үз йортларын 2013 елда сатып алган, акрынлап аны тәртипкә китерә, ә менә коймага әле дә булса куллары барып җитмәгән.
«Алабугада мондый программаның эшләве турында ишеткәнем бар иде, әмма анда эләгү авыр дип уйладым. Күршебез аңа эләгә алмады. Дөрес, ул үзенең кишәрлеге эчендәге койманы алыштырырга йөргән иде. Уйладым да, бәхетемне сынап карарга булдым. Барысы да гади булып чыкты. Кирәкле документларны тиз арада җыеп, башкарма комитетка алып бардым», — дип сөйли Ирина Волкова.
Алабуга районы халкы йортлары янындагы стационар коймалар ремонтлана һәм алыштырыла;стационар коймалар өчен төп шарт — архитектура-сәнгать образы, материаллары һәм төсләре бер стильдә булырга тиеш; стационар коймаларның күзгә күренерлек җитешсезлекләре булу. Грант конкурсында катнашуга дәгъва итүчеләрнең шәһәр бюджетына субсидияләр, бюджет инвестицияләрен кайтару буенча бурычлары һәм башка бурычлары булмаска тиеш.
«Гаризаларны тикшерүче махсус комиссия уңай карар чыгарган очракта, йорт хуҗалары койманы үзләре алыштыра, аннары аларга акчалата компенсация бирелә», диелгән хәбәрдә.
