Россиядә РФ Дәүләт флагы көнен бәйрәм итү уңаеннан хор акциясе узды. Анда Татарстанның камера хоры катнашты, ул Казан Кремле диварлары янында республиканың халык артисты Миләүшә Таминдарова җитәкчелегендә Олег Газмановның «Вперед Россия» җырын башкарды.
Акциягә илнең барлык төбәкләренең хор коллективлары кушылды, дип билгеләп үтә Татарстан Мәдәният министрлыгы Телеграм-каналында. Акция нәтиҗәләре буенча Россиягә багышланган җырны бөтен илдән төрле коллективлар башкарган бердәм видеоролик төшерелгән.
Видеороликны Интернетта Россия флагы көненә багышланган төрле мәйданчыкларда, шулай ук телевидение эфирларында карарга мөмкин.
Искәртик, Владимир Путин Россиядә яшәүчеләрне Дәүләт флагы көне белән котлады. Шулай ук Татарстан Рәисе Рөстәм Миңнеханов социаль челтәрдәге сәхифәсенә бәйрәмгә багышланган видеоролик куйды.
