Гамәлдәге программа буенча 60 млрд сумга 28 мең данә техника алынган. Узган елны 3 меңнән артык данә авыл хуҗалыгы техникасы яңартылган.
Татарстанда техник һәм технологик модернизациягә республика бюджетыннан ел саен 1,8 млрд сум акча бүлеп бирелә. Бу хакта «Казан Экспо»да узган «Авыл хуҗалыгы» юнәлеше буенча РФ Дәүләт Советы комиссиясе утырышында ТР Премьер-министры Алексей Песошин белдерде.
«Җитештерүне технологик яктан тәэмин итүгә аерым игътибар бирелә. 2012 елдан бирле авыл хуҗалыгы җитештерүен техник һәм технологик модернизацияләү, чыгымнарны субсидияләү республика программасы эшләп килә», – диде Песошин.
Гамәлдәге программа буенча 60 млрд сумга 28 мең данә техника алынган. Узган елны 3 меңнән артык данә авыл хуҗалыгы техникасы яңартылган, шул исәптән «Росагролизинг» ташламалы программасы буенча – 763 авыл хуҗалыгы машинасы.
ТР Хөкүмәте башлыгы сүзләренчә, узган ел йөз гектар чәчүлектә энергия белән тәэмин ителеш 178 ат көченә арткан. «Без аны быел арттырырга уйлыйбыз», – дип ышандырды ул.
Утырыш «Бөтенроссия кыр көне» кысаларында уза. Анда катнашучыларны РФ Президенты ярдәмчесе, Дәүләт Советы секретаре Игорь Левитин сәламләде. Ул ассызыклаганча, РФ Президенты Владимир Путин куйган, технологик суверенитетка ирешү бурычы үзенең актуальлеген бүген дә саклый.
Комиссия рәисе, Алтай крае губернаторы Виктор Томенко Татарстанга чараны мондый кунакчыл мәйданда уздыру мөмкинлеге өчен рәхмәтен белдерде.
