Апас районында Россия һәм Татарстан рәссамнарының пленэр-симпозиумы уза. Рәссамнар ике атна дәвамында ачык һавада районның истәлекле урыннарын сурәтләп, рәсем ясыйлар. Бу хакта «Апастово-информ» хәбәр итә.
Шулай ук районның Сара Садыйкова исемендәге сәнгать мәктәбенең сынлы сәнгать бүлегенә йөрүче балалар өчен мастер-класслар уздыралар.
Рәссам, график, сәнгать белгече, Россия Рәссамнар берлеге әгъзасы, Череповец дәүләт университетының сынлы һәм декоратив-кулланма сәнгать һәм архитектура бүлеге профессоры Вера Филиппова рәсем буенча, Россиянең атказанган мәдәният хезмәткәре Владимир Башкирковя, Казан халык сәнгать кәсепләре техникумы укытучысы Ландыш Садеретдинова әвәләү һәм керамика буенча мастер-класс тәкъдим итте.
«Балалар бик теләп катнашты, бик күп кызыклы мәгълүмат алды», - дип хәбәр итте сәнгать мәктәбе җитәкчесе Фатыйх Хисамов.
