Әгәр дә сез ел саен бирелә торган түләүле ял вакытында авырып китсәгез, рәсми рәвештә «больничный» рәсмиләштерергә һәм авыруыгыз турында эш бирүчегә хәбәр итәргә кирәк, дип искәрттеләр Хезмәт һәм мәшгульлек буенча федераль ведомствода. «Российская газета» шул турыда яза.
Ачыклап үтүләренчә, Хезмәт кодексының 124нче маддәсе бар, анда бу очракта эш бирүче хезмәткәрнең ялын озайтырга яки аны башка срокка күчерергә тиешлеге язылган. Түләүле ял кеше авырып киткән көннәр санына озайтылырга тиеш.
Ә менә ял вакытында хезмәткәр түгел, ә аның баласы авырып китсә, шуңа күрә «больничный» рәсмиләштерергә туры килсә, отпуск кичектерелми һәм озайтылмый. Әгәр дә, әлбәттә, мондый мөмкинлек эш бирүче тарафыннан каралмаган булса.
