Шушы көннәрдә Татарстан сәламәтлек саклау министры урынбасары, Казан шәһәре Башкарма комитетының Сәламәтлек саклау идарәсе башлыгы Владимир Жаворонков Яшел Үзәннең район үзәк хастаханәсе коллективына яңа баш табибны тәкъдим итте. Ул – Рамил Рафиз улы Мөхәммәтдинов.
Моңа кадәр баш табиб вазифаларын вакытлыча Эльмир Гатин башкарган иде. Бу хакта «Яшел Үзән» хәбәр итә.
«Татарстан Сәламәтлек саклау министры Марсель Миңнуллин боерыгы белән сездә яңа җитәкчене билгелибез. Эш юнәлешләре билгеле, проблемалар да юк түгел. Аларны бергәләп чишәргә тырышачакбыз. Без Яшел Үзән район сәламәтлек саклау системасының көчле булуын телибез», – диде Владимир Жаворонков.
Рамил Мөхәммәтдинов 1998 елга кадәр Казанның 13нче шәһәр хастаханәсендә эшли. 1999-2005 елларда ашыгыч медицина ярдәме хастаханәсенең хирургия бүлеге табиб-хирургы.
2005-2020 елларда – Казан шәһәренең «Сугыш ветераннары өчен госпиталь» ДАССОның поликлиника эше буенча баш табиб урынбасары, 2020-2021 елларда «Яшел Үзән үзәк район хастаханәсе» ДАССОның баш табибы вазифаларын башкара. 2021 елдан Казан буенча Сәламәтлек саклау идарәсе җитәкчесе урынбасары булып эшләгән.
