2023 елда якынча 8 миллион укучы Бөтенроссия тикшерү эшләрен язачак. Ул 1 марттан старт алды. Өстәвенә, 4-8 сыйныф укучылары аларны штат режимында язачак, ә менә 10 һәм 11 сыйныфларда Бөтенроссия тикшерү эшләрен үткәрү турындагы карарны һәр мәктәп мөстәкыйль кабул итәчәк. Бу хакта ТР Мәгариф һәм фән министрлыгы матбугат хезмәте хәбәр итә.
Быел тикшерү эшләре нәкъ 10 һәм 11 сыйныфларда башлана. 1 марттан 25 мартка кадәр унынчы сыйныф укучылары география, унберенче сыйныф укучылары - тарих, биология, география, физика, химия, чит телләр, шулай ук социаль-гуманитар фәннәр буенча бердәм тикшерү эше язачак. Шунысы мөһим: унберенче сыйныф укучыларының тикшерү эшләре БДИ формасында тапшыру өчен сайлап алынмаган предметлар буенча гына үткәрелергә тиеш.
4-8 сыйныф укучылары өчен 2023 елның 15 нче мартыннан 20 нче маена кадәр Бөтенроссия тикшерү эшләре узачак. Һәр параллельдә рус теле һәм математика буенча эшләр мәҗбүри булачак.
Сүз уңаеннан, 5-8 нче сыйныф укучыларының тарих, биология, география һәм җәмгыять белеме буенча эш язу мөмкинлеге булачак. Моның өчен расписаниедә 4 апрельдән 17 апрельгә кадәрге чор һәм резерв көн - 18 апрель көннәре каралган.
2023 елда беренче тапкыр математика һәм физика буенча тирәнтен дәрәҗәдәге Бөтенроссия тикшерү эшләре уздырылачак. Алар әлеге предметларны тирәнтен өйрәнүче 7 һәм 8 сыйныфларда узачак.
