Сарман районында кыш балык тоту ярышы уздыру матур традициягә әверелде. Ул быел дүртенче тапкыр оештырылды. Анда ел саен район башлыгы Фәрит Хөснуллин да килә, балыкчылар белән күрешеп, аларны күзәтеп, җиңүчеләрне тәбрикли. Быел кышкы балык тоту фестивален Шыгай авылында уздырдылар.
Ярышта катнашырга теләп 65 балыкчы теркәлгән иде. Балык тотучылар да, аларны карарга килүчеләр дә шактый җыелган. Бу хакта «Сарман» сайтында хәбәр ителә.
«Иң яшь балыкчы» булып Тимерхан Латыйпов танылды. 80 яшьлек Илгиз Исмәгыйлев «Иң өлкән балыкчы» буларак бүләкләнде. Шәмсемөхәммәтовлар бөтен гаиләләре белән балык тотарга килгән. Алар да махсус призга ия булды.
Хатын-кызлар арасында иң күп балык тотучы булып Дружбадан Ләйлә Долгунова танылды. Ир-атлар арасында Радик Сәгыйтов иң остасы иде. Иң зур балыкны гомер буе урманчы булып эшләгән Рашат Мортазин тоткан. Иң кечкенә 5 граммлы балыкны Иршат Гыйльфанов каптырган.
Соңыннан барысы да район мөхтәсибәте һәм Сарман гимназиясе әзерләгән тәмле пылау һәм мәтрүшкәле чәй белән сыйланды, коймактан авыз итте. Рәхәтләнеп биергә, күнел ачарга да мөмкинлек булды. «Сарман» кинотеатры директоры Ринат Шәрәфетдиновның уен-көлкеле комментарийлары, аралашу, очрашу барысына да яхшы кәеф бүләк итте.
Фото: © «Сарман»
