Татарстанда торгызылган мәдәни мирас объектлары һәйкәлләр генә түгел, ә туристларны җәлеп итү үзәкләре булырга тиеш. ТР Мәдәни мирас объектларын саклау комитетының һәм ТР Туризм буенча дәүләт комитетының уртак коллегиясендә бу йөкләмәне Татарстан Президенты Рөстәм Миңнеханов бирде.
«Мәдәни мирас объектлары һәйкәлләр булып кына калмасын иде, ә җәлеп итү һәм компетенцияләр ноктасына әверелсен иде. Алар барысы да республикада яшәүчеләр һәм кунаклар мәнфәгатьләрендә эшләргә тиеш. Без бу юнәлештә зур алга китеш барлыгын күрәбез», - диде Рөстәм Миңнеханов.
Ул дини объектларны аерым билгеләп үтте. ТР Президенты фикеренчә, бу юнәлештә Татарстанның зур базасы бар, аны да эш хәленә китерергә кирәк. Бик күп тарихи эчтәлекле объектлар бар, бу территорияләрне үстерү планын эшләү зарур.
