Кичә кич Чаллы – Сарман трассасында җитди юл-транспорт һәлакәте булган.
«Татар-информ» хәбәрчесе сөйләвенчә, 13нче модельле «Лада» машинасы белән идарә иткән 21 яшьлек егет каршы як полосага чыккан һәм Volkswagen машинасына бәрелгән, ә аннары Renault автомобиле белән бәрелешкән. Renault каршы як полосага чыгып очкан һәм анда тагын бер «Лада»га килеп бәрелгән.
«Юл-транспорт һәлакәтендә 13нче модельле машинаның йөртүчесе һәм пассажиры зыян күрде. Аларны җитди тән җәрәхәтләре белән хастаханәгә салдылар. Шулай ук Volkswagen машинасына утырган хатын-кызга медицина ярдәме күрсәтелде», – дип төгәлләштерде агентлык хәбәрчесе.
