(Казан, 1 март, «Татар-информ»). Татарстанда ЮХИДИ машина йөртүчеләрне буран вакытында тизлекне арттырмаска чакыра.
«Татар-информ»га республика Дәүләт автоинспекциясендә хәбәр итүләренчә, синоптиклар фаразлары буенча, сишәмбе, 2 мартта, республикада буран, секундына 17 метрга кадәр көчле җил, юлларда бозлавык булырга мөмкин.
Республика ЮХИДИе машина йөртүчеләргә һава торышы бозылган вакытта кискен маневрлардан сакланырга һәм башка хәрәкәт юлына күчүдә сак булырга, куркынычсыз хәрәкәт тизлеген сайларга кирәклеген искәртә. Бик кирәк булмаганда торак пунктлардан читкә чыгарга киңәш ителми. Балаларны машинада бары тик автокреслоларда гына йөртергә, ә шофер һәм пассажирларга куркынычсызлык каешларын эләктерергә кирәк.
Җәяүлеләрдән шулай ук игътибарлы һәм сак булу сорала. Юл аша бары тик билгеләнгән урында һәм светофорның рөхсәт итә торган сигналы булганда гына чыгарга кирәк. Киемдә яктылык кайтара торган элементлар булырга тиеш.
Юлда штаттан тыш хәлләр килеп туган очракта ярдәм сорап 8-843-533-38-88 телефоны буенча мөрәҗәгать итәргә кирәк.
