(Казан, 22 декабрь, «Татар-информ»). Санкт-Петербург композиторы Александр Маноцков иске татар телендә оратория иҗат иткән. Бу хакта Татарстан Республикасының Санкт-Петербург шәһәре һәм Ленинград өлкәсендәге Даими вәкиллеге матбугат хезмәте хәбәр итә. Александр Маноцковның тугыз тавыш һәм агач бәрмә уен кораллары өчен «Ахырзаман, яки агач оҗмах» дигән ораториясе «Зөя утрау шәһәрлеге» музей-тыюлыгының «Татар бистәсе» Агач археологиясе музеенда башкару өчен махсус язылган. Сөләйман Бакыргани XII йөздә иҗат иткән ахырзаман турындагы китаптан өзекләр (XIX йөз ахырында Казан рухание Евфимий Малов аны тәфсилле аңлатмалар белән рус теленә тәрҗемә иткән) һәм Осип Мандельштамның «агач оҗмах» турындагы шигыре (Луиза Янсуар тәрҗемәсендә) әлеге музыкаль әсәрнең нигезенә яткан.