(Казан, 10 июль, «Татар-информ»). Узган тәүлектә Татарстан табиблары 36 кешегә Covid-19 диагнозы куйган, читтән килгән очраклар юк. Бу хакта Татарстан Президентының матбугат хезмәте җитәкчесе Лилия Галимова хәбәр итте. «14 кеше - хастаханәдә, 22 кеше өйдә дәвалана», — диде ул. Авыру йоктыручыларның иң күбе 60-70 яшьлекләр арасында — 12 кеше, шулай ук 30-50 яшьлекләр арасында 11 кеше авырый. Авыручыларның иң күбе Казанда -13 кеше һәм Питрәч районында - 3 кеше. 10 июльгә Татарстанда коронавирус белән авыруның 4929 очрагы теркәлгән. 3767 кеше дәваланып беткән, шул исәптән 33 кеше узган тәүлектә терелгән.