(Казан, 11 май, «Татар-информ», Марат Ишкилдин). Казанда узган атнада гадәттән тыш хәл яки аның барлыкка килү куркынычы булганда үз-үзеңне тоту кагыйдәләрен бозган өчен 2 меңнән артык беркетмә төзелгән. Бу хакта Татарстан башкаласы мэриясендә узган эшлекле дүшәмбедә Россия Эчке эшләр министрлыгының Казан буенча идарәсе башлыгы урынбасары Валерий Саматошенков хәбәр итте.
«Тулаем алганда, үткән атнада гадәттән тыш хәл яки аның барлыкка килү куркынычы булганда үз-үзеңне тоту кагыйдәләрен үтәмәгән өчен 2 меңнән артык беркетмә төзелгән. Чаралар уздыру чорында барлыгы 6 меңнән артык беркетмә теркәлде», — диде Саматошенков.
Аның сүзләренчә, 3,5 меңгә якын беркетмә суд тарафыннан каралган.
«Бүгенге көндә Казан шәһәрендәге оператив хәл тотрыклы һәм контрольдә тора», — дип нәтиҗә ясады спикер.
