(Казан, 28 ноябрь, «Татар-информ»). 2-4 декабрьдә Уфада беренче тапкыр Миләүшә Мортазина призына Бөтенроссия вокалчылар бәйгесе узачак. Бу хакта «Башинформ» агентлыгы хәбәр итә.
Конкурсны Заһир Исмәгыйлев исемендәге Уфа дәүләт сәнгать институты (легендар педагог ярты гасырдан артык шунда эшләгән) оештыра. Бәйге төрле яшь төркемнәре буенча «Ялгыз җыр» номинациясендә үткәрелә.
Уфа дәүләт сәнгать институтыннан хәбәр итүләренчә, бәйгегә Башкортстаннан, шулай ук Екатеринбург, Казан, Магнитогорск, Чиләбе, Пермь шәһәрләреннән йөзгә якын гариза килгән инде. Аларның барысын да мәдәният һәм сәнгать көллиятләре, музыка югары уку йортларының «Академик җыр» юнәлеше буенча вокал бүлекләрендә белем алучы студентлар тәшкил итә.
Конкурс 2 декабрь көнне 10.00 сәгатьтә Шаляпин исемендәге Концерт залында ачыла. Катнашучылар арасында жирәбә үткәреләчәк. Конкурс тыңлаулары 2-3 декабрьгә билгеләнгән. 4 декабрьдә 12.00 сәгатьтә бәйгедә җиңүчеләрне бүләкләү тантанасы һәм гала-концерт була.