(Казан, 27 ноябрь, «Татар-информ», Гөлнар Гарифуллина). Бүген алтынчы чакырылыш ТР Дәүләт Советының бишенче утырышында «Татарстан Республикасында архив эше турында» ТР Законына үзгәрешләр кертү турында» закон проекты кабул ителде. Ул республиканың архив эше турында законнарын камилләштерүгә юнәлдерелгән.
Татарстанның Архив эше буенча дәүләт комитеты рәисе Гөлнара Габдрахманова гражданнарда архив документларына ихтыяҗ артканын билгеләп узды. Статистика шуны күрсәтә. Бер елда архивның уку залларына 8 меңгә якын кеше килә.
Гөлнара Габдрахманова сүзләренчә, кулланучыларда архивларга килмичә генә документлар белән электрон формада танышуга ихтыяҗ зур. «Бу очракта читтән килүчеләргә юл чыгымнары тотылмый дигән сүз», — ди ул. Татарстанда архивка килмичә генә дәүләт хезмәте күрсәтү буенча уңайлы сервис эшли: «Татарстанның бердәм архив мәгълүмати системасы» булдырылган.
Бердәм мәгълүмати система булдыру мәгълүмати хезмәт күрсәтү оперативлыгын һәм сыйфатын арттырырга, архивларга һәм бегечләргә эш йөкләнешен киметергә мөмкинлек биргән. 2016 елдан башлап архив документлары этаплап цифрлаштырыла. Архив документларының электрон күчермәләре мәгълүматлары банкы тулылана. Архив документларының кәгазьдәге төп нөсхәләре дә таушалмый кала.
Гөлнара Габдрахманова ТАССРның 100 еллыгына 42 мең данә саклау берәмлеге цифрлаштырылганын әйтте. Бу ТАССР оешкан көннән бүгенге көнгә кадәр 7 миллион норматив акт кәгазе.
Закон проекты нигезендә, республиканың архив эше өлкәсендә вәкаләтле органы эксперт-тикшерү комиссиясенең ТР архив фонды составына конкрет докуменларны кертүне хәл итү буенча вәкаләтләрен тәгаенләштерү күздә тотыла.
