(Казан, 27 ноябрь, «Татар-информ», Рузилә Мөхәммәтова). Әлмәт шәһәре янындагы 1700 га җир территориянең мастер-планын әзерләү буенча халыкара конкурска куелды. Бүген «Татар-информ»да үткәрелгән матбугат конференциясендә оештыручылар конкурс шартлары белән таныштырдылар.
«Бу Россиядәге иң зур шәһәр төзелеше концепцияләренең берсе булыр дип уйлыйм. Без конкурска куелган урынны зур бер парк дип күз алдына китермибез. Монда яр буе территориясе дә, эшлекле өлеш тә булыр. Без финалда территориягә Европача карашны да, Азия карашын да күрербез дип өметләнәбез», — диде ТР Президенты ярдәмчесе Наталья Фишман-Бекмамбетова.
Әлмәт муниципаль районы башлыгы Тимур Нагуманов билгеләнгән территорияне тасвирлады. Ул аның шәһәр янәшәсендә булуын ассызыклады. «Без бу территорияне шәһәр тормышына кертергә телибез. Әмма сак караш сорыйбыз. Без аның табигый үзенчәлеген югалтырга теләмибез», — диде ул.
«Биредә шәһәр янәшәсендә генә булуына карамастан, кеше кулы кагылмаган урыннар да бар. Анда елга буе да, урман да кергән, Сабан туе да шушында уза, ат спорты комплексы да төзелгән. Анда флора белән фауна да гаҗәеп. Шунлыктан бу тирәләрне үзләштерү өчен комплекслы караш кирәк», — диде ул.
Әлмәт шәһәре янындагы территориянең мастер-планын әзерләү буенча халыкара конкурс 27 ноябрьдән 2020 елның 23 апреленә кадәр үткәреләчәк. Оештыручылар конкурсны бүгеннән ачык дип игълан иттеләр.
Конкурсның инициаторы — Әлмәт шәһәре администрациясе һәм «Татнефть» җәмгыяте. Конкурс Татарстан Республикасы Хөкүмәте ярдәме белән үткәрелә.
