(Мәскәү, 23 ноябрь, «Татар-информ»). Илдә «Бердәм Россия» партиясе гамәлгә куйган илкүләм проектлар уртача гомер озынлыгын арттыра һәм аның сыйфатын яхшырта. Казан мэры, партиянең шәһәр бүлеге секретаре Илсур Метшин Мәскәүдә партиянең XIX съездында шул хакта хәбәр итте.
<~>«Бүген Президент тәкъдим иткән барлык илкүләм проектлар шул исәптән партия проектлары буенча да гамәлгә ашырыла – алар теләсә кайсы шәһәр, муниципалитетны борчый торган төп проблемалар. Мин мэр булып эшли башлаган чагында шулар хакында хыялланган идем. Бүген теләсә кайсы илкүләм проект – шәһәр, район, төбәк һәм тулаем алганда бөтен ил ирешергә тиешле сыйфатлы һәм ачык индикатор», - диде Метшин.
<~>«Казан үрнәгендәге гап-гади әйберләр. Мин эшли башлаганда уртача гомер озынлыгы 67 яшь иде. Бүген без 76 яшькә якынлашып киләбез, аны 78гә җиткерү бурычы тора. Туучылар санын арттыру, балалар арасында үлем-китем очракларын киметү, торак йортлар, юллар төзү, иҗтимагый киңлекләр булдыру – болар барысы да илкүләм проектлар. Аларны безнең «Бердәм Россия» партиясе гамәлгә куйды», - дип ачыклык кертте шәһәр башлыгы.
<~>