Rusiyeniñ nezaretinde olğan Qırımnıñ Yuqarı mahkemesi Qurman rayon mahkemesiniñ Qırımtatar Qurultayınıñ Merkeziy saylav komissiyasınıñ reisi Zair Smedlâğa qarşı memuriy tevqif ve cöreme ile bağlı qararlarına berilgen istinaf şikâyetini red etti. Bunı "Qırım birdemligi" cemaat birleşmesi haber etti.
Advokat Rustem Kâmilevniñ fikrince, er eki alda – Rusiye Memuriy uquq bozma qanunnamesiniñ em 20.3, em de 20.3.3 maddesi üzre müşterisiniñ qabaatı isbatlanmadı. Dava materialları Rusiye ekstremizm ile küreş merkezi hadiminiñ esabatları ve onıñ "öz teklifleri" esasında azırlanğan.
Şikâyetlerde daa evel mudafaa tarafı memuriy uquq bozma terkibi olmağanını ve Smedlâ qanunsız celp etilgenini ve bu "siyasiy tazyıq" olğanını qayd etti. Qırımnıñ Yuqarı mahkemesi başlanğıç mahkemeniñ qararını quvette qaldırdı.
Martnıñ 24-nde saba Qırımnıñ Qurman rayonında Rusiye uquq qoruyıcıları Qırımtatar Milliy Qurultayı Merkeziy saylav komissiyasınıñ yolbaşçısı Zair Smedlânıñ evinde tintüv keçirdi. Tuvğanlarınıñ malümatına köre, Smedlâ tutuldı ve yerli Rusiye polisiniñ bölügine ketirildi. Smedlâ 2022 senesi martnıñ 9-nda Facebook içtimaiy ağında paylaşqanlarınen «Rusiye ordusını itibardan tüşürgeninde» qabaatlandı. O künü saifesinde böyle bir paylaşuv da oldı: «Dünyanıñ genotsidni olmaycaq operatsiyalardan ayırması içün daa ne qadar barışıqsever sakin, qadın ve yañı doğğan bala can bermeli?» Bundan ğayrı, Smedlâ 2014 senesi martnıñ 1-nde paylaşqanları içün «natsist timsalleriniñ propagandasında» qabaatlana, anda Qırımtatar Milliy Qurultayı Merkeziy Saylav komissiyasınıñ yolbaşçısı Aqmescitteki kenassanıñ divarları ile foto yerleştirgen edi. Şu divarğa natsist Almaniyanıñ svastikası qara boyanen yapılğan edi. Zair Smedlânıñ advokat Emine Avamilevağa añlatqanına köre, bu kerçekten öyle edi, amma maqsadı bu vaqia aqqında er kesni haberdar etmek edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
