Mayısnıñ 9-nda Avropa Şurasınıñ Baş kâtibi Mariya Peyçinoviç-Büriç Ukrayina prezidenti Volodımır Zelenskıy ile körüşti.
"2022 senesi Avropa kününde Kıyivde prezident Zelenskıy ile beraber olmaqtan ğurur duyam. Avropa Şurası Ukrayinanı destekley", dedi o.
Ukrayinanıñ Avropa integratsiyası meseleleri baş nazir muavini Olga Stefanişina ile körüşüv vaqtında o, Rusiye ordusınıñ qadınlarğa ve balalarğa qarşı cinsiy zorbalığını "eñ qatiy şekilde" takbih etken.
Zelenskıy Telükesizlik Şurasınıñ başına fevralniñ 24-nde keniş mıqyaslı istilânıñ başlamasından soñ Rusiyeni terkibinden çıqarğan ilk teşkilât olğanına köre teşekkür etti.
"Biz, Ukrayinağa destekni ve Rusiyeniñ memleketimizge qarşı tecavuzkâr cenkini ayıplağan bu kibi adımlarnı yüksek qıymetlendiremiz. Baş kâtip Marii Peyçinoviç-Büriç ziyaret içün minnetdarım. İşğalcilerniñ Kıyiv vilâyetinde yapqan arbiy cinayetlerge şahsen emin olmañız bizim içün müimdir", - dedi devlet başı.
Prezident ofisiniñ malümatına köre, körüşüv iştirakçileri Baş Prokurorğa yardım etecek uquq ekspertlerniñ gruppasını tekşil etilmesini ve Ukrayinada yerli cemiyetlerge destek kösterecek Cities4Cities yañı onlayn platformasınıñ başlanmasını muzakere ettiler.
Aprelniñ 2-nde Kıyiv vilâyeti Rusiye ordusından azat etildi. RF ordusı keri çekilgen soñ azat etilgen şeer ve köylerde silâsız adamlarnıñ kütleviy ölümi alları qayd etildi. İlk nevbette söz Buça aqqında kete.
Ukrayina ve bazı Ğarp memleketleri Rusiyeni Kıyiv vilâyetindeki arbiy cinayetleri içün mesüliyetke çekmege talap eteler.
Rusiye işğal vaqtında yüz bergen öldürüvler faktı satellit resimleri ile tadıqlanğanına baqmadan, Kreml "silâsız adamlarnıñ öldürüvi ile bağlı er angi qabaatlavlarnı red ete".
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
