Rusiyeniñ nezaretinde olğan Aqmescit şeeriniñ merkeziy rayon prokuraturası qırımlı faal Sergey Akimovnı Qırımda mayısnıñ 9-nda Ğalebe künü qayd etilgende "ekstremist faaliyeti ile küreş qanunlarınıñ bozuluvı qabul etilmeycegine" dair tenbiledi.
Rusiye prokuraturasınıñ malümatına köre, Akimov "mahsus operatsiyağa" narazılıq bildirip "yasaq etilgen tedbir" keçirmek niyetindedir.
Müessise, "qabaatlı şahıslar mesüliyetke celp etilecek", dep tenbiley.
Akimov tenbi vesiqasını Aqmescitniñ Rusiye prokurorı bergenini bildirdi. Bundan ğayrı, Akimov iç bir aktsiya keçirmeycegine dair senet yazğan.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
