RF Baş Prokuraturası Qırım aq qoruyıcı gruppasını "instenmez teşkilât" kibi tanıdı, dep haber etile müessiseniñ Telegram kanalında.
Rusiye Baş prokuraturasınıñ fikrince, aq qoruyıcılarnıñ faaliyeti "Rusiye Federatsiyasınıñ Anayasa qurulışı ve telükesizligi içün havlıdır".
Qırım aq qoruyıcı gruppası yarımadada insan aqları bozuvlarını nezaret ve qayd ete. Aq qoruyıcılar er şey arasında daa siyasiy faallerge qarşı basqılar ve "Hizb ut-Tahrir" tarafdarlarınıñ taqip etilüvi aqqında aytıp bereler.
"Malümatnıñ azırlanması ve darqtılması zaman Qırım aq qoruyıcı gruppası obyektivlik, kerçeklik ve aktuallik kriteriylerine esaslana. Qırım aq qoruyıcı gruppasınıñ terkibine 2014 senesi fevral ayından başlap Qırımda insan aqları bozuvlarınıñ monitoringi ve vesiqalaştırılması ile oğraşqan türlü memleketlerden olğan ekspertler, aq qoruyıcılar ve jurnalistler kire. Qırım aq qoruyıcı gruppası esasen RF-nıñ Qırımda qanunsız areketelri ile bağlı insan aqlarınıñ bozulmasına diqqat ete", - dep yazıla teşkilâtnıñ saytında.
Qırım aq qoruyıcı gruppasınıñ temsilcileri Rusiye Baş prokuraturasınıñ bildirmesini şimdilik daa izaatlamadı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
