Türkiye Cumhuriyetiniñ prezidenti Recep Tayyip Erdoğan «Putin ile yapqan er körüşüvde» «Türkiyeniñ Qırımnıñ işğaline qarşı olğanını» ayta, dep bildirdi. Bu aqta Türkiye lideri Arnavutlıq ziyareti vaqtında jurnalistlerge ayttı, dep bildire «Anadolu» haber agentligi.
«Putinnen yapqan er körüşüvde Türkiyeniñ Qırımnıñ işğaline qarşı olğanımıznı aytam. Tış işler nazirligimiz aynı şekilde bularnı bildire. Yani bu meselede bizim siyasetimiz belli», – dedi Erdoğan.
O, Ukrainanıñ Rusiye tarafından işğal etilüv stsenariyi «kerçekten uzaq» dep adlandırdı. Erdoğan, «Moskva böyle bir adım atmaq içün bütün dünyadaki vaziyetni ve öz vaziyetini közden keçirmeli», dep qayd etti.
Türkiye prezidenti Ukrainadaki vaziyetni Azerbaycan prezidenti İlham Aliyevnen muzakere etmege niyetlene, dep bildirdi.
«İlham Beynen laf etecem. Tabiiy ki, Putinnen de bu meselelerni muzakere etmek kerek. Çünki bu regionlar artıq cenkni qabul etip olamaz. Bular doğru da olmaz. Artıq cenkni siyaset tarihından silip taşlamaq kerekmiz», – dedi Erdoğan.
Rusiye tarafı Erdoğannıñ bu aytqanlarına şimdilik cevap bermedi.
2021 senesi Birleşken Milletlerde Türkiye prezidenti memleketiniñ Qırım ilhaqını tanımağanını tekrarladı. Kreml, Erdoğannıñ Qırım lafları onıñ Rusiye ziyaretine tesir etmeycek, dep bildirgen edi.
Erdoğan, Türkiye «Rusiye ve Ukraina munasebetleriniñ kerginleşüvini toqtatmaq içün issesini qoşmağa azır», dep bildirgen edi.
2021 senesi noyabrniñ 26-nda Ukraina prezidenti Volodımır Zelenskıy Kyiv Türkiye prezidenti Recep Tayyip Erdoğan vastasınen Vladimir Putinge Ukraina azat etilüvini beklegen ukrainalı siyasiy mabüslerniñ cedvelini berdi, dep bildirdi. Kreml Zelenskıynıñ aytqanlarını tefsir etmedi.
