Qırımdaki mahkeme Eldar Enverovnıñ cöremesine qarşı berilgen istinafnı red etti
Bunı «Qırım birdemligi» cemaat birleşmesi haber etti.
Özü Enverov mahkeme qararı evelden belli ve o sımarlanğan olğanın ayttı.
«Bütün bu qararlar evelden alına. Qadılar içün qanunlar yoq, dava materiallarında men piketet iştirak etkenimni tasdıqlağan bir şey yoq, amma diñlevlerde tercimannıñ iştiragi olarnı pek meraqlandırdı. Yazıq ki, Qırımda adalet ve qanunlar yoq», – dedi o.
Oktâbrniñ 25-nde Aqmescitteki Qırım garnizon arbiy mahkemesiniñ binası ögünde Rusiye quvetçileri Qurmandaki «Hizb ut-Tahrir davasınıñ» mabüslerine qoltutmaq içün toplaşqan 20-den çoq kişini tuttı. Tutulğanlarnı Aqmescitniñ Merkeziy rayon polis bölügine alıp kettiler.
Daa soñra Rusiyeniñ Merkeziy rayon bölügine kelip, saba mahkeme ögünde tutulğan qırımtatarlarğa uquqiy yardım köstermek içün kelgen advokat Edem Semedlâyevge qarşı «poliske boysunmağanı» içün memuriy protokol tizildi.