Dekabrniñ 14-nde Rusiye quvetçileri Primorskiy qasabasında (Kefe) tutqan 23 yaşındaki qırımtatar Kurtumer Çalgozovnı evge yibrdiler.
Bunı «Qırım birdemligi» cemaat birleşmesi haber etti.
«Kurtumer Çalgozovnıñ aytqanına köre, maşnada baylı közlernen edi ve Aqmescitke oña bellisiz binağa ketirilgen. Anda onı gaz borusında diversiya ile bağlı sorğuğa çekkenler. Genç oğlan bu vaqianen bağlı iç bir malümatı olmağanını aytqan», – dep yazıla bildirmede.
Qayd etile ki, yaqın vaqıtta onı daa bir sorğu bekley eken. Saba tutıp alınğan telefonını oña daa qaytarmağanlar.
Dekabrniñ 14-nde Primorskiy qasabasında (Kefe) Rusiye quvetçileri 23 yaşındaki qırımtatar Kurtumer Çalgozovnı tuttılar. Tutulğannıñ anası Selime Çalgozovanıñ birleşmege aytıp bergenine köre, tintüv saba saat 5:15 başlanğan ve 3 saat devam etken. Kurtumerniñ telefonını tutıp alğanlar. Tintüvden soñ soyları munasip protokolnı imzalağanlar. Qayd etilgeni kibi, tintüv vaqtında evde Çalgozovlarnıñ bütün aile azaları buluna edi - baba, ana, Kurtumer ve onıñ eki qız qardaşı, birisi 7 yaşında eken.
Qırım.Aqiqatqa Kurtumerniñ anası Selime, quvetçiler onı sorğulağanını amma ne yerde olğanını aytmağanlarını bildirgen edi
