«Hizb ut-Tahrir davası» mabüsi Servet Gaziyevniñ advokatı Edem Semedlâyev Tahqiqat komitetine ve Rostov vilâyetiniñ prokuraturasına (Rusiye) şikâyet ve cismaniy ve maneviy iskence faktına köre SİZO-ğa ariza yolladı. Bunı Semedlâyev Qırım.Aqiqat mühbirine haber etti.
Sentârniñ 29-nda advokat müşterisi ile körüşip oldı ve vaqianıñ tafsilâtlarını ögrendi.
«Sentâbrniñ 19-nda onı Rusiye Devlet Dumasına saylavlarda rey berip olması içün kameradan çıqardılar. Ukraina vatandaşı olğanına ve meslegi buña imkân bermegenine atfı etip, bunı etmekten red etti. Bir qaç künden soñ FSİN hadimleri kamera ile kelgenler ve tıraş aqqında sual bergenler. Musulman olğanını ve islâm dinine köre saqal olmaq kerek olğanını aytqan soñ, FSİN hadimleri kameranı qapatıp, Gaziyevni yerge yıqıp, biri arqasına çıqtı, daa ekisi qollarını qayırıp bağladı, dörtüncisi ise tıraş etti. Bütün bular onen beraber kamerada oturğanlarnıñ köz ögünde oldı», – aytıp berdi Semedlâyev.
Bundan soñ Gaziyevniñ arqası ve qolları ağırıp başladı ve bu ağrı alâ daa keçmegen.
«Bugün onen körüşip oldım. Belkemigi ağıra, omuzı da. Ğaliba onı pertti. Daa qolları da pek ağıra. Yatıp, oturıp ve turıp olamay. Bütün vaqıt yüre, ağırğan yerlerini yazmağa tırışa. Amma ağrı toqtamay. Yazda o daa koronovirusqa oğrağan edi ve mikroinsult keçirgen edi», – dedi advokat.
Advokat Lilâ Gemeciniñ haber etkenine köre, Rostov-na-Donudaki 19-ncı vilâyetlerara verem hastahanesinde 61 yaşındaki qırımtatar sisâsiy mabüsi Servet Gaziyev cısmaniy zorbalıqqa oğratılğan.
Rusiyeniñ Rostov-na-Donu tahqiqat izolâtorında mikroinsult keçirgen Aqmescitteki ekinci «Hizb ut-Tahrir davasınıñ» mabüsi 61 yaşında Servet Gaziyevniñ alı eyileşmedi.
Rostov vilâyeti Rusiye İnsan aqları vekâletlisiniñ apparat reberi Vladimir NekrasovAqmescitteki ekinci «Hizb ut-Tahrir davasınıñ» mabüsi Servet Gaziyevniñ sağlıq vaziyeti fenalaşqanı içün tibbiy teşkerüv keçirmek talabınen muracaat yolladı. Ukraina ombudsmanı Lüdmila Denisova Rusiye insan aqları vekâletlisi Tatyana Moskalkovağa muracaat etip, Gaziyevniñ aqlarını ğayrıdan tiklemege, oña kerekli tibbiy yardım köstermege ve sağlıq vaziyeti sebebinden sıñırlav tedbirini deñiştirmege talap etti.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. Martnıñ 27-nde ve 28-nde Aqmescitniñ rayon mahkemesi bütün tutulğanlarnı apiske aldı.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
