Estoniya Qırımnıñ qanunsız ilhaqını tanımamağa devam ete. Bunı BMT BA 76-ncı sessiyasında umumiy munaqaşalar vaqtında Estoniya prezidenti Kersti Kalyülayd ayttı.
«Biz işğal etilgen Qırımnı ve Ukraiananıñ şarqındaki vaziyetni unutıp olamaymız. Biz Ukrainanıñ topraq bütünligi, suvereniteti ve Rusiye tarafından Qırımnı ilhaq etme ıntılıvnı tanımama siyasetini desteklemege devam etemiz. Telükesizlik bölünmez. Ukraina telükesizligi - bizim de telükesizligimiz. BMT azası olaraq, menim memleketim Telükesizlik şurasınıñ kün tertibinde Rusiyeniñ Donbasqa qarşı tecavuzı ve Qırımnıñ qanusız işğal etilmesi meselelerini saqlamağa devam ete, – dedi o.
BMT Baş Assambleyası Donbas ve Qırım meseleleri çezilecek meydançıqlardan biri ola, dep tüşüne Ukraina prezidenti Volodımır Zelenskıy.
Ukraina Tış işler naziri Dmıtro Kuleba Volodımır Zelenskıynıñ BM Baş Assambleyasınıñ sessiyasında iştirak etmek içün ABDge kerçekleştirecek ziyareti vaqtında «bütün muzakerelerde Qırım qırmızı yip» olacaq, dep bildirgen edi.
BM Baş Assambleyası yetmiş altıncı sessiyasını sentâbrniñ 14-nde açtı. BM Baş Assambleyasınıñ umumiy munaqaşaları sentâbrniñ 21-nden sentâbrniñ 27-ne qadar keçirilecek.
Sentâbrniñ 9-nda BM Baş Assambleyası «Ukrainanıñ vaqtınca işğal etilgen topraqlarındaki vaziyet» maddesini saqlav qararına ve onı Baş Assambleyanıñ 76-ncı sessiyası kün tertibiniñ leyhasına kirsetüvge qoltuttı.
