Permde kimligi belli olmağan kişi devlet universitetiniñ binasında ateş açqanına dair haber peyda olğan soñ, aliy oquv yurtu ücüm etken kişi «yoq etildi», dep bildirdi, dep haber ete «Nastoyaşçeye Vremâ».
İç işler nazirligi universitette «ölgenler ve yaralanğanlar» bar, dep tasdıqladı, amma sayısı şimdilik aytılmay. Perm ülkesiniñ sağlıq nazirligi ücüm vaqtında eñ az on kişi zarar kördi, dep bildirdi.
RBK neşiriniñ İç işler nazirligine yaqın menbası 18 yaşında genç ateş açtı, dep bildirdi. İlk malümatqa köre, üç insan öldürildi.
Resmiy olmağan malümatqa köre, aliy oquv yurtunıñ qaravulları yaralandı, dep yaza 59.ru yerli neşiri.
REN telekanalı insanlar binanıñ ekinci qatından atlağan videolarnı derc etti. İçtimaiy ağlarda derc etilgen videoda insan soqaqta silânen kete.
Bu sene mayıs ayında Kazandaki №175 gimnaziyasında açılğan ateş neticesinde doquz insan elâk oldı: yedi bala ve eki büyük. Daa 23 kişi yaralandı. Tataristan Cumhuriyetiniñ Tahqiqat komiteti Rusiye Ceza kodeksiniñ 105-inci maddesiniñ 2-nci qısmına istinaden – «öldürüv» – cinaiy dava açtı. İç işler nazirliginiñ malümatına köre, 19 yaşında İlnaz Galâviyev ücüm etti. O, bu mektepte oquğan edi, amma soñki 4 yıl devamında yaqından quvulğan kollecde oquy edi. Tahqiqatçılar yapqanlarınıñ sebeplerini ögrene. Rusiye Tahqiqat komiteti bildirgenine köre, 2020 senesi İlnaz Galâviyevniñ miy hastalığı aqqında belli oldı.
2018 senesi oktâbr ayında Keriç politehnik kollecinde patlav ve atış oldı. Rusiye Tahqiqat komitetiniñ malümatına köre, patlavnı 4-ünci kurs talebesi, 18 yaşında Vladislav Roslâkov kerçekleştirdi ve «özüni öldürdi». Şeerniñ Rusiye akimiyeti faciada 21 insan elâk oldı, dep bildirdi.
