Kyivde Hreşçatık soqağında «Qırım. Yaz mevsimi: bizden alınmaycaq şeyler» sergisi açıldı, onıñ çerçivesinde Qırım aqqında hatırlatqan «eserler» taqdim etildi, dep bildire Qırım.Aqiqat mühbiri.
Eserler arasında yırcı Svâtoslav Vakarçuk, oyuncılar Rimma Zubina ve Ada Rogovtseva, qırımlı ukrain rejissöri ve eski Kremlniñ siyasiy mabüsi Oleg Sentsov, Tış işler naziriniñ birinci muavini Emine Ceppar, qırımlı mabüslerniñ advokatı Lilâ Gemeci ve digerleri bergen eşyalar toplandı.
«Qırım aqqında tek yıl ve belli künlerde aytılmaycağını köstergen bir leyhamız. Yarımada işğali problemi aqqında daima hatırlamaq kerek. Qırım – bizden alınmaycaq şey. Tarihqa baqsaq, totalitar rejimler yoq ola, işğal etilgen topraqlarğa ise barışıq kele», – dep tarif etti sergi teşkilâtçılarından biri, «Vatandaş serbestlikleri merkeziniñ» aq qorçalayıcısı Aleksandra Matveyçuk.
Sergi iştirakçilerinden biri, advokat Lilâ Gemeci bu sergige şahsiy arhivinden eki fotoresim berdi, dep bildirdi.
«Birinci fotoresimde balalarnen Qırımda lavanda tarlasında turamız. Bu çeçekni Qırımnen bağlı sayamız, bu çeçekni FSB bölügine ya da SİZOğa müvekkillerimizge ketirmege tırışamız, apiste olsalar bile, topraqlarınıñ qoqusını is etsinler. Ekinci fotoresim – 2018 senesi yanvar ayında Sudaqta olğan adise-vaqialarnıñ fotoresimi. «Qırım birdemligi» teşebbüsiniñ toplaşuvlarından biri vaqtında faal, advokat, vatandaş jurnalistleri qavede Rusiye uquq qoruyıcı organlarınıñ hadimleri tarafından uydurılğan sebeplerden blok etildi. O vaqıt birleşmemiz Qırımda Rusiye akimiyetine ne qadar keder etkenini añladıq», – dep tarif etti advokat.
Bu leyhanıñ teşebbüsçileri Ukraina PENi, Vatandaş Serbestlikleri Merkezi, «Vsi.Svoyı» ukrain brendleriniñ eñ büyük platforması ve Postmen agentligi ola.
Martta berilgen malümatqa köre, Kyivdeki Ukraina Tış işler nazirligi binasında qırımtatarlarnıñ Rusiye tarafından taqip etilüvi ve bunıñ neticesinde zarar körgen balalarğa bağışlanğan «Özüne sadıq qalmaq – cinayet degildir!» sergisi açılğan edi.
