Ukraina Tış işler nazirligi, Rusiye TİN spikeri Mariya Zaharovanıñ, Ukraina akimiyet organlarınıñ Aqmescitteki fahriy konsullıqnıñ açılması sebebinden Nikaragua Cumhuriyetine qarşı sanktsiyalar qoyulmasına dair qararını “kulünçli”, dep adlandırğanıa cevap berdi.
“Rusiyeniñ dünyadaki eñ azından birini Qırım ve Aqyarnıñ Rusiyeniñ subyektleri olğanına inandırmaq içün toqtamağan ıntıluvları ümütsizlik areketidir. Nikaraguanıñ fahriy konsullığınıñ tayin etilmesi Ukraina qanunlarını ve halqara uquqnı qaba şekilde bozdı” – dep yazdı Twitterde Ukraina TİN spikeri Oleg Nikolenko.
“RBK-Ukraina”ğa bergen intervde Nikolenko, Ukraina “suverenitetine qarşı sert tecavuzğa uzlaşuvsız cevap bermege ve Qırımnıñ tezden işğalden azat etilüvi maqsadınen milliy menfaatlarını izçen qorçalamağa” devem etecegini ayttı.
Evel, Rusiye TİN spikeri Mariya Zaharova, Ukraina akimiyet organlarınıñ Aqmescitteki fahriy konsullıqnıñ açılması sebebinden Nikaragua Cumhuriyetine qarşı sanktsiyalar qoyulmasına dair qararını “kulünçli”, dep adlandırğan edi.
Fevralnıñ 1-nde Ukraian prezidenti Volodımır Zelenskıy Yuqarı Radanıñ baqıluvına Nakaraguağa qarşı sanktsiyalar qoyulması aqqında qararnı teklif etti. Fevralnıñ 2-nde Ukraina parlamentiniñ mebusları bu qararğa qoltuttılar.
Avgustnıñ soñunda Ukraina TİN başı Dmıtro Kuleba, Qırımda Nikaraguanıñ fahriy konsullığı açılğanını bildirgen edi. Konsulnıñ vazifesine Qırımnıñ ilhaqında iştirak etken Oleg Belavenets tayin etilgen.
Oktâbrde Ukraina Nazirler Kabineti işğal etilgen Qırımda konsullığını açqanı içün Nikaraguağa sanktsiyalar qoymağa teklif etti. Nikaragua Ukraina ükümetiniñ qararını açıq tefsir etmedi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
