Rusiyeniñ Vlasiha şeerindeki İstinaf arbiy mahkemesi Qırımdan ukrain faali Oleg Prıhodkonı tevqifli qaldırdı. Bu aqta “Qırım birdemligi” cemaat birleşmesine advokat Nazim Şeyhmambetov haber etti.
Böylece, o, Rostov-na-Donudaki tahqiqat tevqifhanesinde 2021 senesi martnıñ 26-nace bulunacaq.
“Oleg Arkadyeviç yaşlı bir adam olğanına ve epidemiya vaziyetini köz ögüne alıp, tahqiqat tevqifhanesinde tutulması onıñ aqlarını bozacağana diqqat çektik. Amma mahkeme Cenübiy arbiy bölge mahkemesiniñ qararını quvette qaldırdı”, – aytıp berdi advokat.
Şeyhmambetovnıñ bildirgenine köre, Prıhodkonı diger kamerağa avuştırğanlar, anda o, daa eki kişinen otura.
“Baquv şaraitine ve sağlığına şikâyet etmey. Oleg Arkadiyeviç biraz suvuqlandı, amma tahqiqat tevqifhanesiniñ tibbiyet bölügi kerekli yardım köstere", – dedi Şeyhmambetov.
Dekabrniñ 16-nda soñki mahkeme oturışuvında Rusiye prokurorı Prıhodko içün üç yılını apishanede keçirecek 11 yıl sert rejimli koloniyada qalmasını istedi ve 200 biñ ruble para cezası berilmesini talap etti.
Oleg Prıhodko 2019 senesi oktâbrniñ 10-nda tutuldı. Rusiye FSBsi onı terror ücümini azırlağanında ve patlayıcı maddelerni qanunsız yapqanında qabaatladı.
Qırım Muhtar Cumhuriyetiniñ prokuraturası Qırımda faalniñ apiske alınğanı sebebinden Ukraina Ceza kodeksiniñ 146-ncı maddesiniñ 1-inci qısmına istinaden (azatlıqtan qanunsız şekilde marum etüv) cinaiy tahqiqat başlattı.
Advokat Nazim Şeihmambetovnıñ malümatına köre, Prıhodko Aqmescit SİZOsınıñ mahsus blokunda tutula.
Bundan evel Prıhodko memuriy dava boyunca işğal etilgen Qırımda mesüliyetke çekildi.
Kreml kontrolindeki Qırımnıñ Saq rayon mahkemesi iyünniñ 25-nde qırımlığan 2 biñ ruble para cezasını berdi. Mahkeme onı Rusiye memuriy cinayetler kodeksiniñ 20.3 maddesiniñ birinci qısmına istinaden qabaatlı dep tanıdı. Qırım.Aqiqatnıñ elinde olğan mahkeme qararına köre, faalniñ evinde tintüv vaqtında tutıp alınğan eşya ve vesiqalarnıñ «tedqiqatı» «Prıhodko üçünci şahıslarnıñ bu eşya ve vesiqalarğa irişmesi vastasınen natsist timsallerini propaganda etkenini ve köstergenini» işaretlemekteN
Faalniñ özü evindeki bütün timsaller «antika», dava malümatında olğan svastikalı kölmek ise «suvenir» ve 2010 berli onda olmağanını ayttı.
2019 senesi fevralniñ 8-nde Qırımdaki FSB idaresiniñ hadimleri Oleg Prıhodkonıñ evini tintken edi. Quvetçiler ukrain timsalleri, «Svoboda» firqasınıñ bayraqları, qırmızı-qara bayraqlar, Stepan Banderanıñ süretleri, tehnika ve ev CD-disklerini aldı. Tintüvden soñ Prihodkonı Aqmescitke alıp ketkenler, anda faaliyeti ve esas Ukraina ile bağları aqqında sorap sorğuğa çekkenler.
