Yalta "Hizb ut-Tahrir davası"nıñ iştirakçisi Müslim Aliyevniñ, "Putin deñişmeleri" içün rey bermekni red etkeninden soñ, Taganrog şeerindeki SİZOda tutuluv şaraiti bozuldı. Bunı "Qırım birdemligi" birleşmesine advokat Edem Semedlâyev haber etti.
Advokat, Aliyevni iyül 7-sinde ziyaret etkenini bildirdi.
"O tutuluv şaraitleri aqqında aytıp berdi. O mağazdaki odada otura, anda pencere yoq. Bunıñ içün pek sıcaq, taze ava kelmey, daa bir adamnen beraber otura... O, bunı deñişmeler içün rey bermegeni içün bir basqı kibi köre. Bundan evel Ukrainanıñ baş konsulı Taras Malışevskiy kele edi ve onı bir yoruqça bir odağa oturtqan ediler", - aytıp berdi Semedlâyev.
İmayeci, Aliyevniñ konsul Malışevskiyniñ ziyaretinden soñ birden yaramayca kamerağa qoyulğanını qayd etti. Onıñ aytqanına köre, imaye buña şikâyet etecek ola.
Daa evel Ukrainanıñ Rostov-na-Donu baş konsulı Taras Malışevskiy, Yaltadaki «Hizb ut-Tahrir davasınıñ» mabüsleri Rusiye Anayasası tüzetüvlerine rey bermekten vazgeçkenini bildirdi.
Cumaaqşam künü, iyünniñ 25-nde, Moskva vilâyetiniñ (Rusiye) Vlasiha şeerindeki Arbiy istinaf mahkemesi Yaltadaki «Hizb ut-Tahrir davasınıñ» altı mabüsiniñ ükmüni deñiştirmeyip qaldırdı.
Böylece, Rostov-na-Donu Cenübiy okrugınıñ arbiy mahkemesiniñ 2019 senesi qabul etken qararı deñişmedi. Mahkeme qararına köre, Muslim Aliyev 19 yılğa, İnver Bekirov 18 yılğa, Emir-Usein Kuku 12 yılğa, Vadim Siruk 12 yılğa, Arsen Cepparov 7 yılğa ve Refat Alimov 8 yılğa üküm etildi. Olar sert rejimli koloniyada qalacaqlar.
Amnesty International aq qorçalayıcı teşkilâtı Yaltadaki «Hizb ut-Tahrir davasınıñ» bütün mabüslerini vicdan mabüsi dep adlandırdı.
Ukraina Tış işler nazirligi bu üküm sebebinden Rusiyege narazılıq bildirdi.
Bu dava boyunca qabaatlanğanlar 2016 senesi fevral-aprel aylarında Yaltada tutulğan edi. Olarnı Rusiyede yasaqlanğan «Hizb ut-Tahrir» islâm siyasiy teşkilâtına alâqaları bar olğanında qabaatlaylar.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
