Qırımlı bloger Nariman Memedeminovnıñ apis müddeti martnıñ 16-na qadar uzatıldı. Böyle qarar fevralniñ 13-nde Kreml kontrolindeki Aqmescitniñ Kiyev rayon mahkemesinde qabul etildi. Memedeminov Rusiye Ceza kodeksiniñ 205-inci maddesiniñ 2-nci qısmına istinaden «terrorizm teşviqatında» qabaatlana. Tahqiqatçı ve prokuror mahkemede bildirgenine köre, Memedeminov «Ukrainada saqlana bile, şu sebepten tevqifi uzatılmalı». Blogerniñ qayd etkenine köre, o, saqlanıp olamaz, çünki vesiqaları FSB bölüginde buluna. Memedeminov 2018 senesi martnıñ 22-nde evinde keçirilgen tintüvden soñ tutuldı. Qırım Muhtar Cumhuriyetiniñ prokuratura bunı azatlıqtan qanunsız şekilde marum etüv dep saya. Rusiye uquq qoruyıcılarınıñ areketleri sebebinden eki cinaiy tahqiqat başlatıldı.
