«Qırımdaki repressiyalar aqqında ikâye etildi». Qırımtatarlarnıñ liderleri Bundestag deputatınen körüşti

Qırımtatalarnıñ liderleri Almaniya ükümetiniñ vekâletlisi olğan alman deputatı Dirk Wiesege “Qırımda qırımtatarlarğa qarşı yapılğan repressiyalar” aqqında ikâye etip berdi, dep haber ete sentâbrniñ 12-nde qırımtatarlarnıñ işleri boyunca Ukraina prezidentiniñ vekâletlisi Mustafa Cemilev.


 “Körüşüv esnasında alman tarafı işğalcilerniñ tamır halqqa qarşı yapqan kütleviy repressiyalar, etnik ceetten yarımada ealisini deñiştirüv boyunca yürsetilgen maqsatlı siyaset, qırımtatar halqını Qırımdan sıqıştırıp çıqarmaq içün kerek şartlar yaratqanı aqqında malümat berdi”, – dep yaza Cemilev Facebookta, Kyivde Wiese ile yapılğan körüşüv aqqında.


Haber etilgenine köre, körüşüvde Qırımtatar Milliy Meclisiniñ reisi Refat Çubarov, onıñ muavini İlmi Umerov, Meclis azaları Eskender Bariyev, Riza Şevkiyev ve Gayana Yüksel iştirak etti.




Aynı zamanda alman deputatı Ukrainanı ilk defa ziyaret etkeni aqqında haber etip, “ilk menbadan” Qırımdaki vaziyet aqqında malümat almaq muim olğanını ayttı dep haber ete “Qırım haber ajansı”.


“FAC bizler olıp keçken vaqialarnı bütünley añlay ve Qırım ilhaqı halqara uquqqa ters kelgenini tekrarlaymız”, – dep ayttı Wiese körüşüv esnasında.


Daa evel Qırım Muhtar Cumhuriyetiniñ prokuraturası ilhaq etilgen Qırımda Rusiyeniñ arbiy cinayetlerini tahqiq etkeni aqqında, şu cumleden, yarımadadan Ukraina vatandaşlarını sıñır tışına çıqarğanı ve Rusiye vatandaşları tarafından müstemlekeleştirilüvi aqqında haber etken edi.


Halqara cemaatçılıq Qırımnıñ işğali ve ilhaqını qanunsız dep tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.