Kyivde «Gençlik» festivaliniñ açılışında Oleg Sentsovnı añdılar
Bunı «Hromadske» bildire.
Tedbir kirişinde musafirlerge «Free Sentsov» yazısı ile poçta kartlarını bere ediler. Merasim vaqtında sanağa vitse-premyer Pavel Rozenko çıqıp, Ukraina rejissörınıñ taqdirini hatırlattı.
Zalda bulunğanlar, mayıs 27-deki vaziyetke köre endi eki aftadan berli açlıq tutqan Oleg Sentsovğa qol tutıp, poçta kartlarını yuqarığa köterdi ve «Sentsovnı azat etiñiz!» dep, defalarca birlikte qıçırdılar.
Tedbirniñ alıp barıcıları Vâçeslav Dovjenko ve İlya Noyabröv, zalda bulunğan musafirler ve türlü devletlerniñ elçilerini Rusiye apishanelerinden Sentsov ve Ukrainanıñ diger siyasiy mabüsleriniñ azat etilmesine qol tutmağa davet ettiler.
Sentsov ve Kolçenko Rusiye mahsus hizmetleriniñ vekilleri tarafından Qırımda 2014 senesiniñ mayısında, yarımadada terroristik aktlar azırlağanlarında qabaatlanıp, yaqalandılar. 2015 senesiniñ ağustosında Rostov-na-Donu şeerindeki Şimaliy Kavkaz okrugınıñ arbiy mahkemesi Sentsovnı, Qırım territoriyasındaki terroristik faaliyette qabaatlap, sert rejimli koloniyada 20 yılğa mahküm etti. Kolçenkoğa 10 yıl koloniya berildi. Ekisi de qabaatlarını tanımadı.
«Memorial» insan aqlarını qorçalav merkezi Sentsov ve Kolçenkonı siyasiy mabüsler cedveline kirsetti.
Ukraina rejissörı, Qırım sakini Oleg Sentsov Yamalo-Nenetsk muhtar okrugınıñ Labıtnangi şeerindeki 8 nomeralı («Beyaz ayuv» adlı) koloniyada buluna. Mayıs 16-da o, Rusiye ve Qırım apishanelerinde bulunğan bütün Ukraina siyasiy mabüslerni azat etmek talabınen açlıq ilân etti.