Advokat, Qırımtatar Milliy Qurultayı delegatınıñ alıp qaçılğanı aqqında tafsilâtlarnı ikâye etti

Rusiye telükesizlik hadimleri tarafından Aqmescit rayonında alıp qaçılğan Qırımtatar Milliy Qurultayınıñ delegatı Asan Egiz Sabla (Partizanskoye) qasabası civarındaki ormanda kötek izleri ile tapıldı.


Advokat Ayder Azamatovnıñ Qırım.Aqiqat muhbirine bildirgenine köre, al-azırda Egiz Aqmescitniñ şeer hastahanesinde buluna.


İmayeci: «Asan saat 15:00 raddelerinde Colman (Pionerskoye) köyünde alıp qaçıldı: GİBDD (Yol areketiniñ telükesizligi devlet inspektsiyası) maşinası onı yol kenarına sıqıştırıp toqtattı. Asan, toqtatılğanınıñ sebebini bilmek içün avtomobilden çıqtı. Bu arada mikroavtobustan GİBDD uniformasında, lâkin şevronlarsız ve maskalı adamlar çıqtı. Olar Asannı öz maşinalarına itep kirsettiler. Anda onı yerge yatqızdı, qoluna buğavlar taqtı, başına torba kiydi ve köteklep başladılar», – dep ikâye etti.


Azamatovnıñ malümatına köre, Rusiye telükesizlik hadimleri onı «bir-bir buçuq saat şeerde kezdirip, köteklediler».


«Ondan soñ onı şeerniñ tışına çıqardılar. Asan maşinanıñ tübüne ışqalanğan otnıñ sesini eşitip, ormanğa alıp ketilgenini añladı. Sabla qasabası civarında (Aqmescitten Bağçasarayğa alıp barğan trassada). Onı avtomobilden çıqardı ve yüzüqoyun yerge qoydılar. Asanğa 200-ge qadar sayıp, ondan soñ kete bilecegini buyurdılar. Ondan torbanı ve buğavlarını çıqardı ve özü kibi alıp qaçılğan avtomobilniñ qayda olğanını bildirdler. Asan, başını kötermeyip, otta 200-ge qadar sayıp yattı. O, köy soqağından trassağace çıqtı, avtomobil toqtattı ve Mamaq (Strogonovka) köyüne qadar keldi ve andan ağası Abduramanğa telefon açtı. Aqrabaları onı işte anda taptı», – dedi advokat.


Mayıs 23-te Aqmescit rayonındaki Colman (Pionerskoye) köyü yanında belli olmağan şahıslar Qırımtatar Milliy Qurultayı delegatı Asan Egiz yaqaladılar. Rusiye FSBsiniñ Qırımdaki idaresinde Egizni yaqalağanlarını inkâr ettiler.


Rusiye telükesizlik hadimleri tarafından açıq menbalarda bu hususta izaatlar berilmedi.


İlhaqtan soñ Qırımdaki faktik Rusiye akimiyeti mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.