Qırımtatar halqınıñ genotsidi hatırasına Türkiyede matem mitingleri keçecek – Çubarov

Türkiyedeki Ankara ve İstanbulda, munasip şekilde mayısnıñ 13 ve 20 künlerinde qırımtatar halqına qarşı yapılğan genotsid neticesinde qurban ketkenlerniñ hatırasına mitingler keçecek. Bunı mayıs 7-de özüniñ Facebookında Qırımtatar Milliy Meclisiniñ reisi, Ukraina halq deputatı Refat Çubarov bildirdi.


Çubarov: «Obyektiv şartlardan dolayı matem mitingleri ya mayıs 18-niñ arfesinde, ya da bu künden az soñra keçecekler. Türkiyede eki büyük mıqyaslı tedbirniñ keçirilmesi planlaştırıla. Ankarada mayıs 13-te meydanlardan birinde matem mitingi ötkerilecek. 5-6 biñ kişiniñ toplanması planlaştırıla. Mayıs 20-de İstanbulda miting Rusiye baş konsullığı qarşısında yapılacaq», – dep qayd etti.




Onıñ bildirgenine köre, ondan ğayrı Kanada ve AQŞta tedbirler planlaştırıldı, lâkin anda olar bu ülkelerniñ devlet erbaplarınen körüşüvler şeklinde keçecekler.


Tedbirler aqqında daa tafsilâtlı malümat olarnıñ keçirilmesi kününe daa yaqın olğanda berilecek, dep qayd etti siyasetçi.


Daa evel Çubarov, qırımtatarlarnı ilhaq etilgen Qırımda mayıs 18-de, Qırımtatar halqını Qırımdan sürgün etüv qurbanlarını hatırlama kününde umum Ukraina sükünet daqqasına qoşulmağa davet etti.


O, Ukrainanıñ qıtadaki qısmında, qırımtatar halqını sürgün etüv qurbanlarınıñ hatırasına matem tedbirleri Herson vilâyeti, Geniçesk rayonı, Novoalekseyevka, Odesa, Lviv ve tedbirler ukrain ve yeudi cemaatlarınıñ iştiraki ile Holokost muzeyinde yapılacaq Dneprde keçecekler, dep qayd etti.


Qırımdan qırımtatar halqını sürgün etüv qurbanlarını hatırlama künü er yıl mayıs 18-de qayd etile. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.