Klimkin: « Qırımda çalışqan halqara şirketlerniñ başlarına yetermiz»

Ukraina Tış işleri naziri Pavlo Klimkin, «siyasiy ve uquqiy usullarnı qullanıp», ilhaq etilgen Qırımda çalışqan halqara şirketlerniñ «başlarına yetermiz », dep tenbi etti.


Yanvarniñ 3-nde Almaniya TİN yolbaşçısı Zigmart Gabriyel ile umumiy matbuat konferentsiyasında çıqış yapqan Klimkin: «Menim fikrimce, bu (Qırımda Siemens turbinaları vaqiası – QA) bütün alman iş adamları ve yalıñız alman iş adamları içün degil accı bir ders oldı. Elbette, şimdi de mallarını parçalap satqan şirketlerine Qırımnı Rusiyeniñ parçası saymağa izin bergen – misal içün, Vokswagen ya da Adidas kibi – büyük şirketler bar. İç şübhesizdir ki, biz, yalıñız siyasiy degil, aynı zamanda uquqiy usullarnı qullanıp, olarnıñ başlarına yetermiz», – dedi.


Onıñ aytqanına köre, Ukraina tarafı «Siemens turbinalarınıñ Qırımğa ketirilmesi vaqiasında olğanı kibi, Rusiye tarafından yapılğan dolandırıcılıq iç bir vaqıt tekrarlanmasın dep, çoq şey yaptı».


Ukraina tış işleri muessiseniñ yolbaşçısı, Almaniya TİN yolbaşçısına «bizim (BMT Baş Assambleyası tarafından qabul etilgen – QA) Qırım qararına ortaq sponsorlıq yapqanı içün» teşekkür bildirgenini söyledi.


Bundan evel QMC Prokuraturası, Ukraina Telükesizlik hizmeti ilhaq etilgen Qırımda ihtimal ile DHL Express, Adidas ve Puma alman şirketleriniñ çalışması aqqında malümatını teşkerecek, dep bildirdi.


2017 senesiniñ iyüninde, yarımadada termik elektrostantsiyanıñ qurulması içün kerek olğan Siemens alman şirketiniñ turbinalarını Rusiye tarafından ilhaq etilgen Qırımğa ketirilmesi ile alâqalı olaraq büyük bir dava başlandı. Siemens ve onıñ iştiraki ile qurulğan «Gaz turbinalarınıñ Siemens tehnologiyaları» şirketi, Avropa Birliginiñ sanktsiyaları ile yasaq etilgen Rusiyeden Qırımğa turbinalarnıñ ketirilmesine qarşı mahkeme davasını açtılar.


Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.