İçtimaiy ağlarda siyasiy mabüslernıñ balalarına qol tutmaq maqsadınen «Qırımdaki balalıq» leyhası başlandı
Leyhanıñ çerçivesinde siyasiy mabüsler içün tedbirlerniñ ötkerilmesi planlaştırıla.
«Qırım birdemligi»niñ Facebooktaki saifesinde: «Balalıq – insannıñ ayatında eñ parlaq ve aqılda eñ qaviy tutulğan dönemdir. O, tekrarlanmaz ve qaytarılmaz. Teessüf ki, siyasiy mabüslerniñ evlâtlarında balalıq, tañda evlerine telükesizlik hadimleri basıp kirgen künü bitti. Buğavlarda, yüzüqoyun – olar o accı tañda sevimli babalarını böyle alda kördiler. Lâkin bu, olarğa babalarını eskiden sevgenleri kibi sevmege ve beklemege keder etmey. Olar em balaları, em de bizler içün qaramanlardır», – dep bildirile.
Daa evel bildirilgeni kibi, siyasiy mabüslerniñ balalarına yardım etken «Bizim balalar» fondu, 1,5 yıl çalışıp, qararnen 7,7 million ruble (qararnen 3,6 million hrivna – QA) topladı.
Qırım ilhaq etilgen soñ Rusiye FSBsi yarımadada qırımtatarlar, musulmanlarnıñ evlerinde tintüvler ötkermege başladı. Neticede bugün 100-den ziyade bala, Rusiye telükesizlik hadimleri tarafından türlü qabaatlavlar boyunca tevqif etilgen babalarından ayırıldı. Bu balalarğa Qırımdaki «Bizim balalar» hayriye fondu yardım ete. Ukrainanıñ qıtadaki qısmında Qırım siyasiy mabüsleriniñ balalarına qol tutuv aktsiyalarını «Qırım ailesi» teşkilâtı ötkere.
Rusiye tarafından ilhaqından soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqası bar dep şübhe altında tutulğan Qırım musulmanlarınıñ evlerinde ketken sayın daa sıq surette tintüvler yapıla.