Gazagystanyň kazyýeti garaşsyz žurnalistlere garşy guralan birnäçe hüjüme gatnaşmakda günäli tapylan bäş adama şertli türme tussaglygy hökümlerini çykardy.
Almatynyň ýöriteleşdirilen etrabara kazyýeti 22-nji noýabrda žurnalistleriň işine päsgel bermekde, olaryň şahsy durmuşyna gatyşmakda, kämillik ýaşyna ýetmedik ýaşlary jenaýat işlerine çekmekde, huligançylykda we hususy emläkleri weýran etmekde aýyplanan Oleksiý Tokarewi dört ýarym ýyl şertli türme tussaglygyna höküm etdi.
Aýyplanýanlaryň beýleki dördüsine, hüjümleriň guralan wagtynda 18 ýaşlarynyň dolmandygy sebäpli, hersine 16 aýdan şertli tussaglyk hökümi çykaryldy.
Azat Ýewropa/Azatlyk Radiosy, ýaşlary sebäpli, olaryň atlaryny agzamaýar.
Gazagystanyň Içeri işler ministrligi mart aýynyň başynda Almatyda "O. Tokarew diýlip tanalýan bir daşary ýurt raýatynyň" tussag edilendigini, onuň hüjümleri utgaşdyrandygyny boýun alandygyny we dört sany ýaranynyň adyny aýdyp, derňew işine "kömek bermäge razy bolandygyny" habar berdi.
Žurnalistlere garşy guralan hüjümleri kimiň buýrandygy häzirlikçe belli bolman galýar.
