Täjigistanyň Nosiri Husraw etrabynyň ýaşaýjylary etniki türkmen bolan oba ýaşaýjysy Rajapgül Safarmyradowa ýerli ýaşaýjylar "traktorçy hola”, ýagny ‘daýza’ diýýärler.
72 ýaşy arka atan bu daýzada 40 ýyldan gowrak döwrüň traktor sürüjilik tejribesi bar. Häzirki wagtda ol çagalaryna we agtyklarynyň ekin işlerine hem-de ýerleri ekişe taýýarlamaga kömek edýär.
Rajapgül Safarmyradowa ogly bilen bilelikde, oktýabr aýynda bugdaý ekjek ýerlerini taýýarladylar. Öz aýtmagyna görä, häzir ol A-27 traktorynda işleýär.
Traktorçy daýza pagta ýygymy döwründe, traktorda köp işländigini gürrüň berýär. Şeýle hem ol ýere dökün pürküji traktorda işlemek tejribesiniň bardygyny aýdýar.
«Häzir men az işleýärin, çagalaryma kömek edýän. Men dürli görnüşli traktorlary, üç tigirlisini-de, dört tigirli traktory-da sürdüm» diýip, ol işlän döwürlerini ýatlap gürrüň berýär.
Rajapgül Safarmyradowa Täjigistanyň Kubodiýon etrabynda dünýä inip, şol ýerde hem ösüp ulalypdyr, 1977-nji ýylda Nosiri Husraw etrabyna, ýagny öň gamalar ösüp oturan jeňňellikden, täze ekerançylyk ýerlerini özleşdirmeli hojalyga göçüp gelipdir. Şondan bäri-de ýerli ýaşaýjylar oňa «traktorçy daýza» diýýärler. Rajapgül daýzanyň gürrüň bermegine görä, ol döwürler aňsat bolmandyr. Sebäbi traktoryň rulunda oturan aýalyň işini hemmeler oňlap barmandyr.
Onsoňam serhet ýakalaryndaky etrabyň ýalynly hem yssy tomsunda, üstesine-de käbir erkek adamlaryň aýal maşgalanyň traktorçy bolmagyna gyýa göz bilen garaýanyny duýýan wagtyňda, traktor sürmegiň asla aňsat bolmandygyny ol ýatlaýar.
«Ýaş wagtymda oba adamlarynyň aýal maşgala traktor sürüjisi bolmaly däl, ol erkekleriň işi, bu aýala aýyp diýýändikleri meniň ýadymda. Meniň yzymdan adamlaryň daş atan wagtlary-da boldy, ýöne men olara üns bermedim» diýip, gürrüňdeşimiz aýdýar.
Ýöne aýtmagyna görä, ony kolhozyň ýolbaşçylary hem etrapdaky ýolbaşçylar mydama goldap gelipdirler. Soňlugy bilen adamlar hem muňa öwrenişip, hatda Rajapgüle hormat goýup başlapdyrlar.
Häzirki wagtda ol Täjigistanyň günortasyndaky hormatly ferma eýelerden biri hasaplanýar, köp tejribe toplan traktorçy daýza sebitdäki oba aýallary bilen öz tejribesini paýlaşýar, bu bolsa jemgyýetçilik guramalary tarapyndan höweslendirilýär. Geçirilýän çärelerde we duşuşyklarda, Rajapgül daýza köplenç göreldeli daýhan hökmünde gatnaşdyrylýar.
Ol häzirki iş şertleri barada, daýhanlara öz pikirini aýdyp berýär. Her bir döwrüň öz kynçylyklary we bökdençlik taraplary bolýar. Bu günki kynçylyk "ýangyjyň bahasynyň ýokarlanmagynda, dökünleriň, himiki serişdeleriň gymmat bolmagynda. Şoňa laýyk kynçylyklar hem ýüze çykýar, şol sebäpli hasyl öňküler ýaly ýokary däl. Dökün bolmasa gowy hasyl bolmaýar, döküne bolsa pul gerek, şoňa görä-de häzir işlemek kynlaşdy" diýýär.
Şeýle-de bolsa, oba hojalygynda dowam edýän kynçylyklara garamazdan, Rajapgül daýza maşgalasynyň garaşyk edýän ýerleriniň mukdaryny artdyrmaga çalyşýar. Rajapgül Safarmyradowa özüniň baý tejribesine esaslanyp, kynçylyklary ýeňip biljekdigine ynanýar.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
