Türkmenistanyň prezidenti Serdar Berdimuhamedow Merkezi Aziýa döwletleriniň baştutanlarynyň bäşinji konsultatiw duşuşygyna hem-de Araly halas etmegiň Halkara gaznasyny esaslandyryjy döwletleriň baştutanlarynyň Geňeşiniň mejlisine gatnaşmak üçin Täjigistana iş saparyna bardy.
Habarda bellenmegine görä, goňşy döwletler bilen netijeli gatnaşyklary pugtalandyrmak we ösdürmek Türkmenistanyň daşary syýasatynyň ileri tutulýan ugurlarynyň biri bolup durýar.
Şeýle-de habarda Türkmenistanyň sebit hyzmatdaşlygynyň meselelerine ähli taraplaryň bähbitlerini nazara alyp, özara hormat goýmak we hoşmeýilli erk-isleg esasynda çemeleşýändigi, bu babatda anyk teklipleri öňe sürýändigi aýdylýar.
Metbugat habarlaryna görä, dördünji gün Duşenbede çarşenbe Merkezi Aziýa ýurtlarynyň ulag ministrleriniň ilkinji duşuşygy geçirildi.
Täjigistanyň ulag ministri Azim Ibrohimiň ýolbaşçylygynda geçirilen duşuşykda türkmen hökümetiniň ýanyndaky Ulag we kommunikasiýalar agentliginiň baş direktory Mämmethan Çakyýew, Gazagystanyň ulag ministri Marat Karabaýew, Özbegstanyň ulag ministri Ilham Mahkamow dagy çykyş etdi.
Duşuşygyň dowamynda Merkezi Aziýa ýurtlarynyň ulag ministrleri "Merkezi Aziýada gury ýer ulaglarynyň özara baglanyşygyny güýçlendirmek barada" Ylalaşygyň taslamasyny tassykladylar. Ylalaşygyň esasy maksady Merkezi Aziýa sebitinde halkara gury ýer geçelgeleriniň ösmegi üçin amatly şertleri döretmekden ybarat diýip, habarda aýdylýar.
Mundan başga, Täjigistanyň we Türkmenistanyň daşary işler ministrleriniň türkmen-täjik strategiki hyzmatdaşlygynyň häzirki meselelerini ara alyp maslahatlaşandygy, wise-premýer Raşid Meredowyň Duşanbede Merkezi Aziýa döwletleriniň daşary işler ministrleriniň duşuşygyna gatnaşandygy habar berilýär.
